1701676607 Untitled 3 1200x560 1

वडाध्यक्षलाई घरमै थुनेर आगो लगाएपछि…

समाचार

धनकुटाको पाख्रीबास नगरपालिका वडा नम्बर ६ का वडाध्यक्ष देवेन्द्र गुरागाईँलाई घरमै थुनेर ज्यानमार्ने प्रयास गरिएको छ। आइतवार राति घरमा सुतिरहेको समय घरमा आगो लगाएर बाहिरबाट थुनिएको घटना सार्वजनिक भएको हो।

नागरिक न्यूजसँगको कुराकानीमा वडाध्यक्ष गुरागाईँले राति करिब १२ः४८ बजेतिर ब्युझिँदा घरभित्र धुँवाको मुस्लो घुमिरहेको बताए। उनले भने, ‘निन्द्राबाट ब्युँझने बित्तिकै घरमा आगो लागिरहेको थाहा पाए। पत्नीसहित बाहिर निस्कन खोज्दा धुँवाका कारण सम्भव भएन। बाहिरबाट ढोका पनि लक गरिएको थियो।’

छिमेकी अम्बिका थापाले भर्‍याङ दिएर झ्यालबाट निस्केर श्रीमती र आफूले ज्यान जोगाएको उनले बताए।

‘हामीमाथि ज्यान मार्ने नियतले नै घटना घटाइएको हो। घरभित्रै थुनेर कसले आगो लगायो किन लगायो कुनै जानकारी आएको छैन। कारण पनि पत्ता लागेको छैन। धन्न समयमै थाहा पायौँ र ज्यान जोगायौं।’ उनले सुनाए।

वडाध्यक्ष गुरागाईँले घटनाको विषयमा प्रहरीले अनुसन्धान सुरु गरेको र एकजनालाई नियन्त्रणमा समेत लिएको जानकारी दिए।

उनले घरभित्रका करिब २/३ लाख बराबरको सामान जलेर नष्ट भएको पनि बताए।

धनकुटाका प्रमुख जिल्ला अधिकारी पुण्यविक्रम पौडेलले वडाध्यक्ष गुरागाईँको घरमा आगोलागी गराइएको र हाल दुबैजना सुरक्षित रहेको बताए। उनले घटनाबारे प्रहरीले अनुसन्धान गरिरहेको पनि बताए।

गुरागाईँ नेपाली काँग्रेसको तर्फबाट निर्वाचित भएका हुन्।

Leave a Reply

Your email address will not be published. Required fields are marked *